.........................................................................................................................................
· Artigos de opinión · Artigos de análisis político · Arquivo·
.........................................................................................................................................

Rajoy e a Pilarica

Miguel-Anxo Murado

PARECEUME hai uns días que saía o rei na televisión, pero resulta que era Rajoy. Non sei que teima teñen os líderes deste partido, o PP, en suplantar ó monarca. Parecen unha ameaza maior para a dinastía que os republicanos. Se Aznar xa casara a filla no Escorial, como se fose el un dos Austrias menores, Rajoy rouballe agora ó rei a súa función de facer anuncios solemnes e mesmo a súa iconografía. Sentado nun escritorio, coa Espasa enteira detrás e a bandeira española a un lado, Rajoy miraba con fixeza o “printer” no que ía lendo un texto con aire de declaración institucional. Pedíanos que fixeramos algún xesto no día da Hispanidade para mostrar a nosa fe nos símbolos de España e sobre todo na súa unidade.

Unha declaración institucional… Pero, ¿de que institución exactamente? Rajoy non ten ningún posto institucional, nin sequera ese anglicismo que se inventou Fraga, o de “xefe da oposición”, que non figura por ningunha parte na Constitución (¿É Rajoy o xefe de Nafarroa Bai?). Rajoy representa únicamente un partido político, o PP, como aló polos 70 representaba a UNE (Unión Nacional Española) a formación carlista-falanxista do ministro De la Mora pola que foi candidato en Pontevedra. Os partidos son xustamente iso, “partidos”, divisións entre os cidadáns, e se o que quería Rajoy era que nos unísemos, nesta ou en calquera outra festa, o mellor que podía ter feito era calar.

Pero é que ademais non me parece que, en concreto, a festa do 12 de outubro sexa a máis axeitada para mostrar unidade. Esta data, que no fondo conmemora un erro de navegación (Colón cría estar na India e estaba nas Bahamas), celebrouse durante anos como o día “da Raza”, logo como o día “da Hispanidade” e agora é unha especie de “Encontro coas Américas”. Se non se aclara a propia festa ¿como nos imos aclarar os demais? Para uns é un desfile militar e para outros o día de cantar a jota aragonesa. Para uns está simbolizada pola bandeira española e para outros polo “pañuelo cachirulo” dos sobrios zaragozanos.Para min, que teño unha Pilar na casa, o 12 de outubro é fundamentalmente a “Pilarica” e o único xesto que se me ocorre facer é o de convidala a xantar fóra a un restaurante vasco, e mentres esteamos a brindar con cava catalán chamará a miña nai para felicitala e falaremos un anaco en galego. Non sei se é iso o que quere Rajoy. Teño a impresión de que non… Pero isto é o que hai.